گلدی بایرام(نوذر استوار)

گلدی بایرام گَیمیش گؤینینگ قارا سن

دگینمدینگ یاری جانلی یارا سن

گو٘ن ایسسیندی چیچگ لر باش قووزادی

ارریمدینگ ، یاراشیرانگ قارا سن

دئمَدینگ بَلله یَن وارینگ باخانگ بیر

داغا ، چؤله ، دو٘زه ، هاردان هارا سن

آچانگ بیر باخیشا داریخمیش گؤینیم

یامان درده فقط سننگ چارا سن

پریشان دیر زولفونگ ، پریوش او٘زلیم!

اَلیم داراخ ، آل اَلینگه  دارا سن

سویوز بیر بالوقام دنگیز دوداقا

ائتیرد بو بالوقی  دوداقلارا سن

شیرین مئی دن مست ائد سورا نیمه جان

گو٘مو٘ش چین لرینگه سن وور دارا سن

هر ایلده گئری آتیرانگ گؤرو شی

قورخیرام کی چاتانگ سن مزارا سن 

 

قول ، غُل ، غول(نوذر استوار)

قولینگ یولونی  بوینوم گؤزلئیر هنی
ایلان اولا ، دولانا ، چالا منی
زنجیر اولا بوینوما قفلی آچماز
غول اولام غُل اینن ، قول آلا منی

قول= بازو
غول = برده ، خدمتکار
غُل  = زنجیر

سنینگ خیالینگ (نوذر استوار)

نه سئیر جانومدان خیالینگ   بوقاناقلِیر شام و سحر

بختک آتموشدئر جانوما   آرالانمئیر قره کهر

 

گئجه یاریان چه گؤینده   یئر سالیر منی یاتیردیر

سحر اُ باشدان خیالینگ   ایشیق اینگه سین باتیردیر

 

یورد سالموش گؤینیمه کؤچمئیر   خیالینگ باشیمدان او٘چمئیر

آغیرلاشموش چوخ مدت دئر   سفرینگ رختینی بیچمئیر

 

بولاق سولانیر گَلَنده   قره داشلاردان دا آخیر

دویدوگ یوخی گؤز یاشیندان   فقط اوتوریر و باخیر

 

خیالینگ گؤینیمه قونشی  آرا طاقتی یوخوم دئر

واری زاد اؤز یئرینده باخ   لایلانان منیم اوخوم دئر

 

سَنه چاتماگ اولموش خیال   منیم ناامید گؤینیمه

خیالینگا یورولارام؟   او٘ز ایل ! بو سینیق بوینومه

 

دَیمَه خیالوم گؤینینه   گیرمَه خیالوم اوینونه

یاقلی جه سنینگ خیالینگ   باقلی خیالیم بوینونه

 

خوشام سنینگ خیالینگا   منَه بو بهر اولدی سندَن

چاتام اؤزینگه ده گؤرَگ   آرالانمیا بو مندَن

 

منی باغیشلا(شعر از ارسلان شعر قشقایی ارسلان میرزایی)

آیریلیب گئدنده بو اوزاق یولو

دالینگچا گلمه دیم منی باغیشلا

من سنی گوزه لیم گوزلریم نورو

تانییب بیلمه دیم منی باغیشلا

 

بو یوللار گوتوروب آپاردی سنی

آپاریب محنتدن قوتاردی سنی

اوره گیم چوخ گزیب آختاردی سنی

تاینگی بولمادیم منی باغیشلا

 

ترپندی دوداغینگ ملک خویونگدا

بالیق کیم توردایدینگ آستا بویونگدا

شانلیگینگ چاغیندا سنینگ تویونگدا

آغلادیم گولمه دیم منی باغیشلا

 

روزگار بئلمه فرصت وئرمه دی

تا عومور آلمادی عبرت وئرمه دی

غروروم الیمه رخصت وئرمه دی

یاشینگی سیلمه دیم منی باغیشلا

 

آیریلیق چاغیندا دئدینگ گله رم

گلمه دینگ قدرینگی ایندی بیلرم

اوزوم اوز یانیمدا دئدیم اوله رم

من سن سیز اولمه دیم منی باغیشلا