بو٘کو٘ل(نوذر استوار)
دوداغینگ داغ الوو اؤپیش بیشیریر
گؤزلرینگ گؤزیم ایتینی کیشگیریر
او٘رَگیم کسیلیر کافر بیر بو٘کو٘ل
بو سفره دن آج آداما ائتیریر
+ نوشته شده در سه شنبه ۱۸ مرداد ۱۴۰۱ ساعت 11:34 توسط نوذر استوار
|
قوجالیگ فصلی(نوذر استوار)
تو٘کَندی یاز ائتیشدی قیش
آقاردی باش تؤکیلدی دیش
چتین اولدی هر آسان ایش
قوجالیگ فصلی یامان دیر
٭٭٭
بو٘کیلدی بئل دیزلَدی دیز
چین آتدی چو٘رریگ اولدی او٘ز
یاقلی شیرین واری پرهیز
چمیگ سیز دیز ناتوان دیر
٭٭٭
تو٘ت توتدی گؤزیم چیراغی
آرالامئیرام ایراقی
چاپوق قوئیر گؤزیم قیراغی
گؤزلریمینگ یاشی سان دیر
٭٭٭
یالونگوزام مجلس لرده
یولداشام هرگو٘ن بیر درده
باشلانمیش آخیرکی پرده
فیلمینگ آخیری عیان دیر
٭٭٭
کوموجا اولموشدور داروم
گؤزیمه گلمئیر نه واروم
فاییزه دؤنمیش بهاروم
اویونچی دونیا یالان دیر
٭٭٭
اوجالموشدور آه و زاروم
چوخ آرزولار هنی واروم
خاطره لر بیرجه یاروم
دونیا گؤزیما دومان دیر
٭٭٭
چوخ اکدیم بیچه بیلمدیم
عشق دن سو ایچه بیلمدیم
تقدیردن قچه بیلمدیم
بو کیشت فایداسی سامان دیر
نوذر استوار مرداد۱۴۰۱
+ نوشته شده در چهارشنبه ۵ مرداد ۱۴۰۱ ساعت 8:9 توسط نوذر استوار
|
