قشقایی دیلی

                                              قویروقی داسّا بَنزِیر

شَهردَن گَلدی اُقولینگ نازیلی سی                     توکَنمَز قیرّوفیرّی چیس وفیسّی

باش کَسَردی کوت و شالوار اوتوسی                    داراموش باشدا گیران کلاه گیسی

بابایا باخدی تا داها قوجالموش                           بئلی اَگیلمیش بُوینوندان اوجالموش

اوزی یانموش اَلیاق  واری یارالموش                     ضعیف اُولوب  رنگ رُخی  سارالموش

افسوس یئدی چُوخ بیحد غمگین اولدی                اؤزینَه نفرین ائتدی گؤزی دُولدی

یاش گؤزدَه  چَکدی یامان هولّ تولّی                     نئچّه اُوراخ بولدی نئچّه داس بولّی

دئدی بابا غم یئمَه غصه یئمَه                               بیچَرَم اَکینی ائدمَه واهمه

بیچَرَم سحر گؤتیرَّم هئچ دئمَه                               اؤزیم بَسَّم داها سَن کارگر سَمَه

بابا دئدی اَکین بیچمَگ شوخلوق دَیل                     اؤزیم بیچَرَم اَکینیمیز چُوخ دَیل

اَکین بیر نهنگ دئر بَبَم بالوخ دَیل                            قالی دَه ایلمَه وار سُوپان قُولوخ دَیل

هَرنَه دئدی بابا گؤردی یُوخ چارا                              اُوغول دِیر رحم ائدمَم گولا من خارا

گَلمیشَم بُویگین قُوجاما من جارا                            بیچَسیم اَکینی من هاردان هارا

گَزدی داسّینگ بُویگینی گؤتیردی                            قُل چیمیرلاخ  بیروارایا  اُوتوردی

بیرساعتَه نئچَّه کؤرتی سوپیردی                            وارا توکَندی یُورناق داسّی قیردی

قُوجا داسّینگ اُبیریسین اوزاتدی                              باشی قویدی بیر داش اوستونَه یاتدی

دئدی بالا گؤزلَه هروقت گون باتدی                            اُویارد مَنی ،اُوغولونی آلّاتدی

گؤزی آچوخ اُوغولونی گؤزلِیردی                                هراَز گاهدان دابیر دورونگَه دئردی

اُوغول یُرولموش داها چابالِیردی                                 دیلی نان آقزی دورونی یالِیردی

گؤردی اُوغول کؤرتیَه بیر داس قیرّیر                            ا َگیلمَمیش توریر آلّینی سیرّیر

یاق دیر اینگار بو گون دَمیندَه اَرّیر                              گول دئر اینگار سو گؤرمَمیشدیر چورّیر

داسلاری واری قیردی اُوغول تؤکدی                           هَنی ظهر اُلماموشدی اُوغول چؤگدی      

دئدی بو نَه اَکین دئر بابا اَکدی                                  بیر گونَه دَرّیمی دالومدا سؤگدی

چاقوردی بابا سونا:داها داس یُوخ؟                            نَه قَدَر آز دئر داسوموز، اَکین چُوخ

ایچدی سودان بیر قارون دئدی اُوخ اُوخ                        آج آدامدان نَه خبر واری بیر دُوخ

گئتدیلَر اُوبایا اُوغول اوزانّی                                       چؤرَگدان آلدی سودان آلدی قانّی

گون باتاندا دیشینَه آلدی جانّی                                 تکیه ائتدی بیر آقاجا قُوزانّی

نئچّه تووخ گؤردی قاپّودا گَزیر                                    ایچیندَه بیر خوروس اؤزونی سوزّیر

دئدی آنا وور خوروسونگ بوینینی                             تمام ائد داها بو تووخ اوینینی

آنا دئدی: نچین بَبَم ؟ آجانگ سَن؟                           خوروس اَتینَه بِیَه مُحتاجانگ سَن؟

دئدی آنا دئمَه گؤینینگ نَمَه سِیر                               بو خوروسینگ قویروقی داسّا بَنزِیر